lanjut carita

Ta skarang su di rumah. Kamareng yang ta carita ta mo pulang tu to. Ta pulang sampe ruma hari sabtu jam 12 lewat. Jadi skarang ta su biking apa yang ta biasa biking dah. Apa coba.

Tara laeng deng tara bukang lagi. Bajaga warong. Banya yang bakomen tentang kita tapi ta mo biking bagemana coba. Ada yang batanya ta liburan kah.

Ta jawab tara, ta tara liburan ta meliburkan diri. Ada yang Tanya mo bale kapan. Ta jawab ta su tar mau bale sudah. Iyo depe rasa macam bagemana bagitu to.

Tapi ini ta p pilihan sendiri. Ta su pulang. Ta su kaluar dari kampus sana barang ta tara sanang disana jadi mo kulia sini saja. Ta tara akang ruba ta p keputusan. 

Ta su jelaskan tentang ini di ta p postingan sebelumnya yang depe judul I am going home. Co ngo baca dah. Kalo mau.

Disitu ta su jelaskan samua. Bakapa skarang ta batulis pake bahasa bagini. Tau akang. Ta mo bacarita saja. Kase bagi apa yang ta rasa dan ta ada pamalas mo pake bahasa Indonesia tinggi yang baik dan benar atau bahasa inggris.

Ta tara kalesang kalo tarada yang mangarti atau bahkan tarada yang baca ini postingan. Yang penting ta bisa kase ungkapkan carita disini.

Ngo tau tarada. Ta kamari to tara bilang p ta p tamang kampus satu me tarada. Ta Cuma batanya di tata usaha kalo mo kaluar tu baurus katarada.

Turus dong bilang tara perlu urus apa-apa kalo mo kaluar. Kacuali nga mo pinda baru nanti baurus itu nilai. Tapi ta bailing me mangkali dong tara sadar kapa. Ta tara kalesang. Disana kita me tarada tamang yang talalu deka kong. Jadi tara apa. 

Kita mo biking kita disana yang kurang lebe anam bulan. Barang kan Cuma satu semester to. Ta mo biking itu bagaikan mimpi saja. Mimpi apa. Mimpi buruk.

Deng sekalian pelajaran hidup. Ta disana to selalu tu baharap ta bisa pulang di ruma turus bangong buka mata di kamar. Bapikir kalo yang kamareng tu samua hanya mimpi. Dan skarang sukur ta su disini. Ta tara mau pigi lagi.

Ta mo kulia disini saja ambe itu unkhair atau ummu tara apa. Yang penting ta kulia disini. Memang dong bilang mutu atau kualitas disini tu tara bae makanya kalo mo bagus tu kulia di luar.

Tapi ta su kulia di luar. Di salah satu pts terbaik. Tapi bagemana coba ta rasa tara sanang disana. Jadi ini bukang mo masalah kualitas. Ta tara paduli deng kualitas. Kan sebenarnya samua itu juga kan tergantung p torang bagemana dalam menjalani to. Kalo tong serius kong biking bae-bae pasti bisa. Iyo to.

Ta skarang su hapus line, Kakao, wechat, whatsapp, facebook, deng twitter di hp. Ta skarang me su jarang tu pake hp lagi.

Barang jaringan disini paleng ancor. Tapi sebenarnya alasan bakapa ta tara pake tu hp lagi bukang Cuma barang jaringan ancor. Tapi ta tara mau sa. Ta bahkan skarang biking akun fb deng twitter yang baru. Yang lama ta su tara pake. 

Ta bukang mo macam kabur dan menghilang. Atau mungkin bagitu. Tau akang. Tapi ta rasa ta tara mau saja. Ta mo ganti nomor baru.

Barangkali ta biking bagini supaya dong yang disana tara bisa kontak p kita kappa i. iyo bisa jadi. Atau ta mo lupa samua yang ada disana dengan cara kas hapus samua akun yang ta punya. Ta bahkan su hapus itu bbm. 

Oio ngo tau tara ta to biking akun fb baru kong add orang-orang yang ta kanal saja to. Kong nga tau ta p tamang skarang barapa. Yang terahir ta cek lia yang su confirm tu ta p add toh Cuma 80. Masa yang ta kanal Cuma sadiki bagitu kah.

Ampong ta me macam barasa sedih bagemana dang bagitu. Masa iyo yang ta kanal sadiki minta ampong macam itu. Di ta p fb yang lama ta p pertemanan amper saribu. Kurang lebe ada anam atau lapan ratusankalo tar sala.

Turus itu ta tara kanal paleng banya. Tapi tara kira yang kanal sadiki skali.Turus tentang ta p twitter ngo mo tau tara. Ta kan follow p dorang turus tara mention toh.

Kong barapa banya yang follback coba. Ta follow sekitar anam pulu yang follback cuma spulu atau seblas nga. Hahaha paleng kasiang dah hiks hiks. Ta p fb deng twitter p gambar sama.

Ta pake gambar yang ta dapa di aplikasi nasa. Gambar bintang-bintang paleng bagus. Ta juga taru ini blog p url di fb deng twitter supaya orang yang lia barangkali mo baca k bagemana bagitu kan lumayan he he.